Act 13 | GAM | STEP | Kune ge Jisas pillgi dji una dumo Antiok moi ge, pende God kandjiye beke awi una molmaka, pende propet molmaka yei. Ga embe moi ge Barnabas, Simyon kandjiye ta Niger, dumo Sairini iwa Lusius, Sol ne, Manain. Asa une ge Erot boll numb taimane molo, soka iwa kune mopill.

a(Song 2.7)

b(Aisaia 55.3)

c(Song 16.10)

d(Habakuk 1.5)

e(Aisaia 49:6)

Acts 13

Una Barnabas ne Sol God kogoye yembell we dji

1 Kune ge Jisas pillgi dji una dumo Antiok moi ge, pende God kandjiye beke awi una molmaka, pende propet molmaka yei. Ga embe moi ge Barnabas, Simyon kandjiye ta Niger, dumo Sairini iwa Lusius, Sol ne, Manain. Asa une ge Erot boll numb taimane molo, soka iwa kune mopill. 2 Kune ge Jisas pillgi dji una God kandjiye amblo pla woro, kwa mapill ye molmaka, God Murble kambono moi al embe dji, Barnabas ne Sol ye dje worneke, soka po na kogena yembell we djill al ge po yembell we dji. 3 Embe dji pille, ga kwa mapill ye, kamang yei. Yei pora djika, soka gaklene al amblo embe dji, ye God kogoye ye er pise! dji.

Barnabas ne Sol er dumo Saiprus pupill

4 God Murble dje worika, soka er dumo Selusia po, sip ta pai al pakna po er dumo Saiprus pupill. 5 Dumo Salamis po molo, Juda una lotu numb yei al, soka po God kandjiye dje orko worpill. Iwa Jon kandjiye ta Mak ge, une boll aike po amblo pille dje awi.

6 Dumo Saiprus paknato soka wane kune ye kere, dumo Papos po pillau djipill. Dumo yei al ge iwa ta moi, kandjiye Barjisas we dji. Une Juda iwa propet kende molo, kudja ye wani. 7 Iwa kerman Sergius Paulus we dji ta moi ge Barjisas une boll aike molo molo yepill. Sergius Paulus ge une nomane momo pai iwa. Une iwa soka wombellka, God kandjiye piyo we dji. Djika soka Barnabas ne Sol wopill. 8 Ba iwa Barjisas kudja yei iwa ge, Grik una kandjine al Elimas we dji ge, une wo iwa kerman Sergius Paulus Jisas kandjiye al pillgi dje djinda dje man dji. 9 Dji ba, Sol kandjiye ta Pol we dji ge, God Murble ge une boll moika, po iwa Elimas dongall kane embe dji, 10 ni Satan wombaye moren. Wal porapora wopake paro ge, ni kunda ye awo, kende kol, akemake yenden una moren. God kondwe wopake yero ge, ni ye ke ye wanden. 11 Pren mo? Ipon God ni tonda, nalen emill yendaka, au djinda ge nakanben, ege kune ta kanben we dji.

Pol kandja embe djika, ola dje kam kupa kama mal ta wo une nale al to pel yei. Une nale emill yeika, abillabill po, una na aglena amblo kond ombine dje aume dji. 12 Une embe yeika iwa kerman Sergius Paulus kane, Jisas boll pillgi dji. Alla Jisas kandjiye beke aupill mal une pille gok dje aya dji.

Pol ne Barnabas er dumo Antiok po kandja dje orko worpill

13 Pol una boll pi ge, sip ta i dumo Papos kere er propins Pampilia paknato dumo Perga po pillau dji ba, iwa aike pi iwa Jon Mak ge kere er yem Jerusalem pi. 14 Une er pika soka dumo Perga kere, er distrik Pisidia pakna po dumo Antiok pupill. Ege Sabat yeika, Juda una lotune numb yei al po ami dje mopill. 15 Lotu numb una kerman kambono iwa Mosis ne, una propet pepa boi mal ge dje awo pora dje kere, iwa ta dje wormaka, Pol ne Barnabas mopill al po embe dji, agana soka, no agle gi djimbon kandja wopake ta panda, dje aumbell pupon we dji.

16 Djika, Pol aglo molo una kandja dje djine dje agle pla woro embe dji, ye Israel una mor ge ne, epil djell God pille pla yenj una ye mor ge, na kandja djindo ge ye pillme! dji. 17 Israel una Godne moro ge, une nono gollne dje i. Dumo Isip moi poke, ga wombane merke molmaka epil kerman moi. Embe molmaka God yembe dongall al dumo Isip kere er orko pi. 18 Kambono singare ke ye wani God tonda mal pai ba, une kane kere pika, ga er dumo wapra yei al po wane molmaka, kognumb 4-pela ten (40) er wo pi. 19 Embe yeika dumo Kanan wombon dje yemaka, God yembe ye unaiwa dulye 7-pela to goi. Kambono makimbne ge i, nono gollne kambono ine dje awi. 20 Ga embe wani ge, kognumb 450 wo er pika, are God dje wori kandja una po Israel una kantau yei. Molo golo pumaka, are propet Samuel moi.

21 Are Israel una God moi al embe dji, ni djimbenka king iwa ta wo no kantau yenda we dji. Djimaka God iwa Kis warye Sol ge dje wori woi. Sol Israel una kantau ye moika, kognumb 4-pela ten (40) pi. Sol epilye kandjiye ge Benjamin we dji. 22 Ba are God king Sol to woro, iwa Depit king moya dje wori moi. God Depit pille kandja embe dje pene wori, Jesi warye Depit na wopake pille aundo. Na kandja djino mal une pille yenda we dji. 23 Alla ye Israel una golo er take dje napine, Depit gollye ta ye i yem worda we dje God kandja embe dji ge, Jisas dje wori woi.

24 Jisas kogo nayei kune, Jon wo Israel una porapora moi al embe dji, ye nomane ake to, nu pame! dji. 25 Jon kogo ye woi pora djinda manda yeika, une po una moi al embe dji, na una ne mal kaima moro dje kaninj ne? dji. God iwa ta dje worno wonda we dji ge, na wale nawondo. Na una wopake namoro, iwa ta are wonda we dji ge, une wopake kaima moya, na une kake su kaye piska tano ge kune nayendo we dji.

26 Pol embe dji, ye Abram gollye mor una ne, epil djell una God pille pla yenj ge, agana kabono, na kandja djindo ye pillme! Iwa ta wo ye i yem worda we dje God dji ge, une nono i yem worda dje pille dji. 27 Dji ba, Jisas wale woi mal ge Jerusalem una ne, ga ngambalne pai una pillpol natoi. Una propet pepa bolo pagi mal, Sabat ege ege kere kane pille kune nayei. Ba Jisas ipo kot ye awo to goi mal ge, propet pepa bolo pagi mal ge kaima pillau dji. 28 Kambono wal me ta napai al Jisas kot ye awo, ipo Pailat moi al woro, to gopen we dji. 29 Una wo tane we dje propet porapora pepa bolo pagi mal ge, kambono ye kune yei pora dji. Jisas iko pera al golo pai ge i kal woro, ipo gull toi. 30 Ipo gull toi ba, God yeika, une alla aglo er wo gun pi. 31 Una Galili kere une boll er Jerusalem woi ge, kambono ege merke une kani. Alla Juda una moi al ga dje pene woro awi mal, no kanpin we dji.

32 No ye mor al kandja wopake dje aunmon ge embe mal paro. Asa God nono gollne kandja dje wori pai mal ge, ipon kandja ge nono boll megye tondo. 33 Ge God yeika Jisas aglo er wo gun pi. Buk Song Sapta tu al kandja ta bolo wori pai ge embe djindo,

Ni na warna moren,
ipon na ni kull we dji. ^a
34 Jisas golo pai ge God i pla worika are yene gakle alla golo bis nayenda we dji ge, Baibel kandja embe mal bolo wori pai.

Na wal wopake uro Depit auno we dje worill pai ge na ye auno we dji. ^b
35 Kandja ge Baibel tabye ta paro al ge embe djindo,

Ni womban wopake uro moro iwa ge, ni nakerben, une goya ba yene gakle bis nayenda we dji. ^c
36 Nono kanmon, kandja dji ge Depit pille nadji. God kandja dji mal ge Depit embe ye wan molo po goi. Goika yene gollye goll pene al ipo gull tomaka, yene gakle bis ye er kal pi. 37 Ba iwa ta goi, God i gun wori moi iwa ge, une gakle bis ye er kal napi.

38 Ye Juda agana abana kabono, embe yei pille, na kandja djindo ge ye pillme! Jisas ge, une ye singare ke ye waninj ge kere auno dje woi. 39 Asa Mosis lo dji mal yepin ba, God nale al wambo pa moi. Ba iwa moro ge, una yene boll pillgi dji dal, ga porapora God nale al wambo napanda, kiwa moye. 40 Propet kambono imb ta wonda we dje pepa bolo pagi mal ge, ye kanpol to moye! Man panda, wal kandja dji ge ye boll wonda! Ga pepa boi ge embe dji,

41 Bakalo awinj una ye mor ge, ye kanne.
Ye kane gok dje molo, po goye!
Na ye manda mor al wo ye tano we djino ba, ye kaima piye nayenda.
Une wo ye tonda we dje kandja kaima djine
ba, ye napiye we dji. ^d
42 Pol kandja embe dje kerika, une Barnabas boll lotu numb kere er bekle boll dje yepillka, una moi ge embe dji, Sabat ege ta yendaka, ye ipon kandja djipill mal, alla wo djimbellka pupon we dji. 43 Una er bekle pumaka, Pol ne Barnabas pupill al Juda una merke are pumaka, epil djell una wo Juda una boll lotu dje dje yei una aike are pi. Pumaka, Pol ne Barnabas embe djipill, God ye wopake ye awi al ye pakna molo pillgi dje pa molme! djipill.

44 Sabat ege ta yeika, dumo kerman una merkeke Iwa Kerman kandjiye pupon dje er Pol ne Barnabas mopill al woi. 45 Molmaka, Juda una kane minj i, Pol kandjiye amblo, une kandja dji mal to kal wori. 46 To kal wori ba Pol ne Barnabas kand nagopill, kandja dje pene woro embe djipill, no God kandjiye djinmoll ge, no asamoll ye Juda una moye al djimboll pai. Ba ye mop awi al ge kanmoll, ye gun molo pane mal ge kune nayendo. No epil djell una mor al po kandja dje aumboll! 47 Iwa Kerman no mopin al embe dji,

Na dje wornaka, ni epil djell una moye al po wamo suwa mal embe mopen.
Ni dumo ulle yemyem po na una dje i yem worno mal ge, dje pene worbena una piye we dji ^e
48 Djipillka epil djell una wo kerman pille, Iwa Kerman kandjiye pille pla yei. Alla una gun molo pane dje God dje i una moi ge, pillgi dji.

49 Embe pille, dumo kerman paknato Antiok ne, dumo kerker yei al ge, Iwa Kerman kandjiye wai djika una merke pi. 50 Pi ba, epil djell Juda lotu ye wani ana kerman ne, una kerman kambono moi al, Juda una po kumbene kulag tomaka ga ellne kumbsika, wo Pol ne Barnabas ye ke ye awo, dumo kerman to orko wori. 51 Embe pille, ga ale yei ge yene kanne dje soka toll makimb kakene al moi ge kill gulo woro, Antiok kere er dumo Aikoniam pupill. 52 Alla pillgi dji una Antiok moi ge, God Murble ga boll moika, wo kerman pi.